کھارادر میں ڈکیتی کے دوران قتل کے ملزم کی گرفتاری، تین لاکھ روپے اور اسلحہ برآمد

کراچی کے علاقے کھارادر میں ڈکیتی کے دوران شہری معین اختر کے قتل میں ملوث ایک ملزم محمد فیصل کو ساؤتھ زون پولیس نے گرفتار کرلیا ہے۔ پولیس کے مطابق اس واردات میں شامل دوسرے ملزم کی گرفتاری کے لیے بھی کارروائیاں جاری ہیں۔

پولیس کے بیان کے مطابق نو ستمبر کو معین اختر اپنے بیٹے کے ساتھ بینک سے رقم نکلوا کر واپس جا رہے تھے کہ موٹر سائیکل سوار دو مسلح افراد نے انہیں روک کر نقد رقم چھیننے کی کوشش کی۔ مزاحمت کرنے پر ملزمان نے فائرنگ کی، جس کے نتیجے میں معین اختر شدید زخمی ہوئے اور بعد ازاں دم توڑ گئے۔

واقعے کا مقدمہ تھانہ ڈاکس میں درج کیا گیا تھا اور پولیس نے تفتیش کا آغاز تکنیکی شواہد اور سی سی ٹی وی کیمروں کی مدد سے کیا۔ اس دوران ملزمان کی شناخت ممکن ہوئی۔

پولیس کے مطابق ملزم محمد فیصل واردات سے قبل بینک کے اندر گیا اور معین اختر کی حرکات پر نظر رکھی۔ بینک سے باہر آنے پر اس نے ساتھی شاہ فیصل سے موٹر سائیکل لی اور واردات انجام دی۔ مزاحمت کے دوران شاہ فیصل نے فائرنگ کی تھی۔

واردات کے بعد دونوں ملزمان شہر کے مختلف علاقوں سے ہوتے ہوئے فرار ہوئے۔ پولیس نے گرفتار ملزم کے قبضے سے تیس بور پستول، موٹر سائیکل اور چھینی گئی رقم میں سے تین لاکھ روپے برآمد کرلیے ہیں۔

پولیس کا کہنا ہے کہ دونوں ملزمان عادی مجرم ہیں اور اس سے قبل بھی مختلف مقدمات میں گرفتار ہو چکے ہیں۔ گرفتار ملزم سے مزید تفتیش کی جارہی ہے جبکہ دوسرے ملزم کی تلاش کے لیے چھاپے مارے جا رہے ہیں۔