بلوچستان میں نئے صوبوں کے قیام کا مطالبہ زور پکڑ گیا

بلوچستان میں نئے صوبوں کے قیام کا مطالبہ تیزی سے بڑھتا جا رہا ہے۔ اس حوالے سے ڈیرہ بگٹی کے شہریوں نے بھی اس مطالبے کی کھل کر حمایت کی ہے۔

ڈیرہ بگٹی کے عوام نے کہا ہے کہ بلوچستان کا وسیع رقبہ انتظامی سہولیات کی فراہمی میں رکاوٹ بن رہا ہے۔ ان کا کہنا ہے کہ صوبے کی بہتر انتظامی تقسیم کے لیے کم از کم چھ سے آٹھ صوبے بنانے چاہئیں۔

شہریوں کے مطابق کوئٹہ تک طویل سفر کے باعث ڈیرہ بگٹی کے رہنے والوں کو طبی اور دیگر بنیادی سہولیات کے حصول میں مشکلات کا سامنا کرنا پڑتا ہے۔ انہوں نے کہا کہ نئے صوبے بننے سے نہ صرف ڈیرہ بگٹی بلکہ دیگر دور دراز علاقوں کے لوگوں کے لیے سرکاری سہولیات تک رسائی آسان ہو گی۔

عوام نے اس امید کا اظہار کیا کہ نئے صوبوں کے قیام سے عام آدمی کو سہولیات اس کی دہلیز پر میسر آئیں گی اور انتظامی معاملات بھی بہتر ہو سکیں گے، جس سے پسماندہ علاقوں کی ترقی کی راہیں کھلیں گی۔