وزیراعظم شہباز شریف کی یورپی یونین کی قیادت سے ملاقات، تجارت اور جی ایس پی پلس پر بات چیت

وزیراعظم شہباز شریف نے اقوام متحدہ کی جنرل اسمبلی 2026 کے موقع پر یورپی کونسل کے صدر انتونیو لوئس سانتوس دا کوستا اور یورپی کمیشن کی صدر ارسولا فان ڈیر لائن سے اہم ملاقات کی۔ اس ملاقات میں پاکستان اور یورپی یونین کے تعلقات سمیت علاقائی اور عالمی امور پر تفصیلی تبادلہ خیال کیا گیا۔

اس موقع پر دونوں جانب سے اس بات پر اطمینان کا اظہار کیا گیا کہ پاکستان اور یورپی یونین کے درمیان اعلیٰ سطحی روابط اور باہمی مشاورت میں مثبت رجحان بڑھ رہا ہے۔

وزیراعظم نے پاکستان اور یورپی یونین کے مابین وسیع البنیاد شراکت داری کو مزید مضبوط بنانے کے عزم کا اظہار کیا اور پاکستان-یورپی یونین اسٹریٹجک انگیجمنٹ پلان پر مکمل عملدرآمد کی اہمیت پر زور دیا۔ انہوں نے کہا کہ قیادت کی سطح پر مسلسل روابط دوطرفہ تعلقات کو مزید تقویت دیتے ہیں۔

شہباز شریف نے پاکستان کی معاشی ترقی اور روزگار کے مواقع پیدا کرنے کے حوالے سے یورپی یونین کے ساتھ تجارتی تعلقات میں جی ایس پی پلس اسٹیٹس کی اہمیت پر روشنی ڈالی اور اس فریم ورک کے تحت یورپی یونین کے ساتھ مسلسل تعاون جاری رکھنے کے عزم کا اعادہ کیا۔

ملاقات میں علاقائی و عالمی صورتحال پر بھی خیالات کا تبادلہ ہوا۔ دونوں فریقین نے اس بات پر اتفاق کیا کہ تنازعات کے حل کے لیے مذاکرات، سفارت کاری اور بین الاقوامی قانون کا احترام ضروری ہے۔ وزیراعظم نے یورپی کونسل اور کمیشن کے صدور کو دوبارہ پاکستان کے دورے کی دعوت بھی دی اور اس بات کی خواہش ظاہر کی کہ دونوں فریقین کے درمیان شراکت داری کو مزید مضبوط کیا جائے گا۔