خلا سے آنے والے پراسرار ریڈیو سگنل کا معمہ حل، سائنس دانوں نے ستاروں کے جوڑے کو سراغ تلاش کر لیا

ماہرینِ فلکیات نے خلا میں نمودار ہونے والے ایک پراسرار ریڈیو سگنل کا معمہ حل کرنے کا دعویٰ کیا ہے۔ یہ سگنل زمین سے ہزاروں نوری سال کے فاصلے پر واقع ستاروں کے ایک غیر معمولی جوڑے سے خارج ہو رہا ہے اور ہر آٹھ منٹ بعد دھڑکن کی طرح محسوس ہوتا ہے۔

آسٹریلیا کی کرٹن یونیورسٹی اور انٹرنیشنل سینٹر فار ریڈیو آسٹرونومی ریسرچ کے ماہرین نے جمعے کے روز بتایا کہ ریڈیو لہروں کی مختصر لہریں اس جوڑے سے نکل رہی ہیں۔ اس جوڑے میں ایک سفید بونا ستارہ شامل ہے، جو کسی فعال ستارے کا مردہ مرکزی حصہ سمجھا جاتا ہے اور اپنے محور پر ہر آٹھ منٹ میں ایک چکر مکمل کرتا ہے۔ اس کے ساتھ ایک جی قسم کا ستارہ بھی موجود ہے جو ہمارے سورج سے مشابہت رکھتا ہے اور اسے عموماً زرد بونا ستارہ کہا جاتا ہے۔

سائنس دانوں کے مطابق یہ پہلا موقع ہے کہ اس نوعیت کے ستاروں کے جوڑے سے ایسے ریڈیو سگنلز دریافت ہوئے ہیں۔ اس سے قبل اس قسم کے سگنلز عموماً چھوٹے اور نسبتاً ٹھنڈے سرخ بونے ستاروں کے نظاموں میں دیکھے گئے تھے، جو کائنات میں پائے جانے والے سب سے چھوٹے اور ٹھنڈے ستاروں میں شمار ہوتے ہیں۔

اس تحقیق سے وابستہ ڈاکٹر سیم میک سوینی نے بتایا کہ یہ پہلی مرتبہ ہے کہ ان سگنلز کو اتنی وضاحت سے دیکھا جا سکا کہ سفید بونے ستارے کو اپنے ساتھی ستارے کے گرد گردش کرتے ہوئے بھی مشاہدہ کیا جا سکے۔ ان کے مطابق اس مشاہدے سے معلوم ہوا ہے کہ یہ ریڈیو سگنلز سفید بونے ستارے کے قریب کسی مقام سے خارج ہو رہے ہیں یا ممکنہ طور پر خود سفید بونا ستارہ ہی ان سگنلز کا منبع ہے۔

ماہرینِ فلکیات کا کہنا ہے کہ یہ دریافت خلا میں ستاروں کے غیر معمولی نظاموں اور ان سے خارج ہونے والے پراسرار ریڈیو سگنلز کو سمجھنے میں اہم پیش رفت ثابت ہو سکتی ہے۔ اس سے قبل بھی ماہرین مختلف آسمانی اجسام سے آنے والے ایسے اشاروں پر تحقیق کرتے رہے ہیں جو کائنات کے رازوں سے پردہ اٹھانے میں مددگار ثابت ہو سکتے ہیں۔